४९. गुरुगीता
सिद्धांनी गुरुगीता शंभुमुखातून जशी आली तशी नामधारकास सांगितली. सर्व लोकांचा उद्धार व्हावा यासाठी हिमालयाची कन्या पार्वती हिने शंकरांना प्रश्न विचारला त्याचे उत्तर म्हणजे गुरुगीता. देहधारी जीव कोणत्या मार्गाने ब्रह्मरुप होईल ? शंकर म्हणाले - गुरुशिवाय अन्य परब्रह्म नाही. हा गुरुच्या महतीचा अध्याय आहे. गु हा वर्ण गुणातीत अवस्था दर्शवितो. तर रु हां वर्ण रुपापलीकडची अवस्था सुचवितो.
पार्वती पुशिलें ईश्वराप्रती। ईश्वरे सांगितले कवणे रीती।
जेणे लोक उद्धरती। ते निरोपावें दातारा ।।९।।
पूर्वी कैलासशिखरी । बैसला होता त्रिपुरारि।
प्रश्न करी शैल्यकुमरी। समस्त लोक उद्धरावया ।।१३।। अध्याय ४९।।
श्रीगुरुगीता ऐकावी। श्रीगुरुगीता उमजावी ।।ध्रु।।।
शिव जे कथिती उमा ऐकते,
श्रवणाने ती समरस होते,
शंका समूळ निरसावी।।१।।
मंत्ररुप झाली गुरुगीता,
आश्वासन ती देते पतिता,
वाट भक्तीची चालावी ।।२।।
अनुग्रहाने, अभ्यासाने,
जिज्ञासेने समर्पणाने,
गुरु ही पदवी लाभावी ।।३।।
शिल्पकार गुरु अनुपम ऐसा,
चेला घडवी आपण जैसा,
परिसा ती सर ना यावी ।।४।।
गुरुगौरव गानात रमावे,
गुरुगौरवगानात विरावे,
दुधात साखर मिसळावी ।।५।।
No comments:
Post a Comment